ஐந்தாம் வகுப்பு 'அ' பிரிவு - நா. முத்துக்குமார்

மழை பெய்யா நாட்களிலும் மஞ்சள் குடையோடு வரும் ரோஜாப் பூ மிஸ்
வகுப்பின் முதல் நாளன்று முன்பொரு முறை எங்களிடம் கேட்டார்:

‘‘படிச்சு முடிச்சதும் என்ன ஆகப் போறீங்க?’’

முதல் பெஞ்சை
யாருக்கும் விட்டுத் தராத
கவிதாவும் வனிதாவும்
‘‘டாக்டர்’’ என்றார்கள் 
கோரஸாக.

இன்று கல்யாணம் முடிந்து
குழந்தைகள் பெற்று
ரேஷன் கடை வரிசையில்
கவிதாவையும்;
கூந்தலில் செருகிய சீப்புடன்
குழந்தைகளை
பள்ளிக்கு வழியனுப்பும்
வனிதாவையும்
எப்போதாவது பார்க்க நேர்கிறது.

‘‘இன்ஜினியர் ஆகப் போகிறேன்’’

என்ற எல்.சுரேஷ்குமார்
பாதியில் கோட்டடித்து
பட்டுத் தறி நெய்யப் 
போய்விட்டான்.

‘‘எங்க அப்பாவுடைய
இரும்புக் கடையைப் 
பாத்துப்பேன்’’
கடைசி பெஞ்ச்
சி.என்.ராஜேஷ் சொன்னபோது
எல்லோரும் சிரித்தார்கள்.
இன்றவன் நியூஜெர்சியில்,
மருத்துவராகப்
பணியாற்றிக்கொண்டே
நுண் உயிரியலை ஆராய்கிறான்.

‘‘ப்ளைட் ஓட்டுவேன்’’
என்று சொல்லி
ஆச்சரியங்களில்
எங்களைத் தள்ளிய
அகஸ்டின் செல்லபாபு,
டி.என்.பி.எஸ்.சி. எழுதி
கடைநிலை ஊழியனானான்.

‘‘அணுசக்தி விஞ்ஞானியாவேன்’’
என்ற நான்
திரைப் பாடல்கள்
எழுதிக் கொண்டிருக்கிறேன்
வாழ்க்கையின் காற்று
எல்லோரையும்
திசைமாற்றிப் போட,

‘‘வாத்தியாராவேன்’’
என்று சொன்ன
குண்டு சுரேஷ் மட்டும்
நாங்கள் படித்த அதே பள்ளியில்
ஆசிரியராகப் பணியாற்றுகிறான்.

‘‘நெனைச்ச வேலையே செய்யற,
எப்பிடியிருக்கு மாப்ளே?’’ என்றேன்.
சாக்பீஸ் துகள் படிந்த விரல்களால்
என் கையைப் பிடித்துக்கொண்டு

‘‘படிச்சு முடிந்ததும்

என்ன ஆகப் போறீங்க? என்று
என் மாணவர்களிடம்
நான் கேட்பதே இல்லை!’’
என்றான்.

பூ பூக்கத்தானே செய்கிறது

எழுத்தாளர் பிரபஞ்சன் நினைவு தினம்.

(21 டிசம்பர் 2018)

1996 இல் திமுக ஆட்சியின்போது முதல்வராக இருந்த கருணாநிதி அவர்களை தற்செயலாக சந்தித்து இருக்கிறார் எழுத்தாளர் பிரபஞ்சன்.

அந்த சந்திப்பின்போதுதான் கருணாநிதி அவர்களுக்கு தெரியும், வாடகை வீட்டில்தான் பிரபஞ்சன் இன்னும் வசித்து வருகிறார் என்பது !

சென்னையில்  மேன்ஷன்களிலும்,

வாடகை வீடுகளிலும்தான்

ரொம்ப காலமாகவே வசித்து வந்திருக்கிறார் பிரபஞ்சன்.

இதையறிந்த கருணாநிதி அவர்கள் ஆச்சரியத்தோடு கேட்டார்.

"என்ன சொல்கிறீர்கள் பிரபஞ்சன், இதுவரை நீங்கள் சொந்த வீடு வாங்கவில்லையா ?"

ஒரு நொடியும் சிந்திக்காமல் பிரபஞ்சன் இப்படிச் சொன்னார்.

"குங்குமம் இதழில் கதை எழுதினால் நூறு ரூபாய் கொடுக்கிறார்கள். இதில் எப்படி நான் வீடு வாங்குவது ?"

படைப்பாளிக்கே உரிய பரிகாசம்...!

ஒரு கணம் திகைத்துப் போன கருணாநிதி அவர்கள் உடனடியாக பிரபஞ்சனுக்கு வீடு வழங்க உத்தரவிட்டார்.

முதல்வருக்கு நன்றி சொல்லிவிட்டு புறப்பட்டார் பிரபஞ்சன்.

ஒரு பத்திரிகை நிருபர் கேட்டார். "வாடகை வீடு, மேன்சன் வாழ்க்கை, 

இவ்வளவு பிரச்சினைகளுக்கும் மத்தியில் எப்படி இத்தனை அற்புதமான விஷயங்களை எழுதிக் கொண்டிருக்கிறீர்கள் ?"

அதற்கு புன்னகைத்தபடி, 

தனது பிரபலமான அந்த வாசகத்தைக் கூறினார் பிரபஞ்சன்.

"எவ்வளவு பிரச்னைகளுக்கு மத்தியிலும் 

ஒரு பூ பூக்கத்தானே செய்கிறது !''

நல்லவன் வாழ்வான்

சாரதா ஸ்டூடியோவில் எம்.ஜி.ஆருக்காக நான் எழுதிய  முதல் பாடலின்  ஒலிப்பதிவு !

இஷ்ட தெய்வங்களையெல்லாம் வேண்டிக்கொண்டு ஸ்டூடியோவிற்குச் சென்றேன்.

பகல் 12 மணியளவிற்கு எம்.ஜி.ஆர். வந்தார். பாட்டைக் கேட்டார். பாட்டின் பின்னணி இசை திருப்தியாக இல்லை என்றார்.

சில மாற்றங்கள் செய்யப் போதுமான நேரம் இல்லாததால் ரிக்கார்டிங் ரத்து செய்யப்பட்டது.

10 நாட்களுக்குப் பிறகு மீண்டும் சாரதா ஸ்டூடியோவில் ஒலிப்பதிவிற்கான தேதி குறிக்கப்பட்டது. அன்று பகல் 12 மணியளவில் பி.சுசீலாவிற்கு உடல் நிலை சரியில்லையென்று ஒலிப்பதிவு ரத்து செய்யப்பட்டது.

பிறகு ஒரு மாதம் கழித்து இன்னொரு நாள் ஒலிப்பதிவிற்கான தேதி குறிக்கப்பட்டது. அன்று சீர்காழி கோவிந்தராசனின் குரல் சரியாக இல்லையென்று சொல்லி, அன்றும் ஒலிப்பதிவு ரத்து செய்யப்பட்டது. 

அந்தக் காலத்தில் டிராக் எடுத்துவிட்டு பிற்பாடு குரலைப் பதிவு செய்யும் வழக்கமெல்லாம் அமலுக்கு வரவில்லை.

அவ்வளவுதான் ! இயக்குனர் நீலகண்டன் ஒரு முடிவெடுத்து விட்டார்.

“வாலி  எழுதிய  இந்தப்பாட்டு, ராசியில்லாத பாட்டு. எனவே   மருதகாசியை வைத்து வேறு பாட்டு எழுதி ஒலிப்பதிவு செய்யலாம்” என்று சொல்லி விட்டார் நீலகண்டன்.

இதைக் கேட்ட வாலி வாடிப் போய் நின்றாராம். சற்று நேரத்தில் 

மருதகாசியையும் பாட்டு எழுத அழைத்து வந்து  விட்டார்களாம்.

வந்தவர் ஏற்கனவே வாலி  எழுதியிருந்த பாடலை, ஒரு முறை கையில் வாங்கிப் பார்த்தாராம்.

பதைபதைக்கும் உள்ளத்தோடு, 

வாலி ஒரு ஓரமாக நின்று கொண்டிருக்க, 

வாலி எழுதிய வரிகளை நிறுத்தி நிதானமாக வாசித்துப்  பார்த்த கவிஞர் மருதகாசி இப்படி சொன்னாராம் :

"இந்தப் பையன் நல்லா எழுதியிருக்கான். இவனுடைய வாழ்க்கை என்னால் கெட்டுப் போவதை நான் விரும்பவில்லை. இந்தப் பாட்டையே படத்தில் வைத்துக்கொள்ளுங்கள். பாப்புலராகும்..!'' 

கண்களில் நீர் வழிய  வாலி சொல்கிறார் இப்படி :

“அண்ணன் மருதகாசிக்கு அன்றைக்கே மனதுக்குள் ஆலயம் எழுப்பி வழிபட்டேன். பிறகு என் பாடலையே பதிவு செய்து படப்பிடிப்புக்குப் போனார்கள்..!”

மருதகாசி மனதாரப் பாராட்டிய அந்தப் பாடல் :

"சிரிக்கின்றாள் இன்று சிரிக்கின்றாள்.

சிந்திய கண்ணீர் மாறியதாலே'' 

படம் :"நல்லவன் வாழ்வான்''

நவம்பர் 29 - மருதகாசி நினைவு தினம். 

சுஜாதாவின் அறிவியல் ஆளுமை

எந்திரன் படத்தில் ஒரு காட்சி வரும்

வசீகரன்: பிரபஞ்சத்தில் மனித உயிர் என்பது ஒரு தனிப்பட்ட விபத்து. இவ்வளவு பெரிய பேரண்டத்தில் உயிர் மட்டும் தற்செயலாக அமைந்தது.

சிட்டி:  உயிர் என்றால் என்ன

வசீகரன்:   DNA என்ற மிகப்பெரிய மூலக்கூறு

சிட்டி: DNA வை வரைந்துவிட்டு "இதுதான் உயிரா" என்று கேட்கும்.

வசீகரன்:  "உயிர் என்பது ஃபார்முலா இல்லை, பாக்டீரியாவுக்கு உயிருண்டு சோடியத்திற்கு உயிரில்லை" என்பார். 

சிட்டி:  "எனக்கு உயிர் இருக்கிறதா ?" இந்தக் காட்சி பின்வருவாறு முடியும். 

சிட்டியின் மீது ஒரு மின்னல் அடித்து அதன் மூலம் சிட்டி தூரப் போய் விழும், ஆனால் அருகில் இருந்த வசீகரனுக்கு எதுவும் ஆகாது 

"இந்தப் பிரபஞ்சத்தில் உள்ள உயிர் பொருள் என்பதை யும், உயிர் ஆக்கப்பட்ட பொருளயும் உணர்த்தும்"

பணம் - சுஜாதா

என்னிடம் ஒரு பழக்கம் தொடர்ந்து இருந்து வந்தது. ஒரு அளவுக்கு மேல் பணம் சேர்க்க மாட்டேன், சேராது!.

எப்போதும், தேவைக்குச் சற்றே சற்று குறைவாகவே பணம் இருக்கும். இதில் ஒரு பரவசம் இருக்கிறது.

ஒரு சிறிய அறிவுரை, அதிகப் பணம் சேர்க்காதீர்கள். இம்சை, தொந்தரவு...

என் அனுபவத்தில் ஓரளவுக்கு மேல் பணம் சேர்ந்து விட்டால், ஒரு பெரிய செலவு வந்தே தீரும்.

இது இயற்கை நியதி.

அந்தச் செலவு வைத்தியச் செலவாக இருக்கும் அல்லது வீடு, கார் ஏதாவது வாங்கினதுக்கு வங்கிக்கடனாக இருக்கும்.

இதிலிருந்து முக்கியமாக நான் கண்டுகொண்டது,

செலவு செய்தால்தான் மேற்கொண்டு பணம் வருகிறது என்பதே.

இன்று பலருக்கு என் பண மதிப்பைப் பற்றிய மிகையான எண்ணங்கள் இருக்கலாம். உண்மை நிலை இதுதான்.

இன்றைய தேதிக்கு கடன் எதுவும் இல்லை. என்னிடம் இருக்கும் பணத்தில் குற்றநிழல் எதுவும் கிடையாது. ராத்திரி படுத்தால் பத்து நிமிஷத்தில் தூக்கம் வந்து விடுகிறது.

மணிரத்னம் மற்றும் ஷங்கர்- TravelRival

மணி   1983லயிருந்து படம் எடுத்திட்டிருக்கார். 

ஷங்கர் 1993லயிருந்து படம் எடுத்திட்டிருக்கார். 

மணி 1992ல ரோஜா, மதுபாலா ஹீரோயின்
ஷங்கர் 1993ல ஜென்டில்மேன். சேம் ஹீரோயின்  
மணி 1995ல பாம்பே எடுத்தார்.
ஷங்கர் 1996ல இந்தியன் எடுத்தார். சேம் ஹீரோயின். 
1997ல மணி, இருவர். 
1998ல ஷங்கர்,  ஜீன்ஸ். சேம் நாயகி. ஐசு. 
1998ல தில்சே, மணி
1999ல ஷங்கர், முதல்வன். சேம் ஹீரோயின். 
2001ல ஷங்கர் நாயக் எடுக்கிறார். ராணி முகர்ஜி. 
இந்த முறை மணி ராணியை வச்சு ஷாதியா எடுக்கிறார். 
2002ல மணி 5ஸ்டார்ங்கற 5மாணவர்கள் கதையை தயாரிக்கிறார். 
ஷங்கர் 2003ல 5மாணவர்களை வச்சு பாய்ஸ் எடுக்கிறார். 
2004ல மணி 3 ஹீரோவை வச்சு ஆயுத எழுத்து எடுக்கிறார்.  ஷங்கர் 2005ல ஒரே ஹீரோ மூணு வேடம். படம் அந்நியன். 
2007ல மணி சாதாரண மனிதன் பணக்காரனாமாறுன குரு எடுக்கிறார். 
2010ல ஷங்கர் பணக்கார சிவாஜி சாதாரணமா மாறுற சிவாஜி எடுக்கிறார்.  
மணி ஐசுக்கிட்ட ராவணனுக்காக போறார். 
ஷங்கர் எந்திரனுக்காக போறார். 

அப்புறம் இரண்டு பேரும் லிங்காககிற இன்னொரு விஷயம். ARரஹ்மான். அவரோட அதிக ஹிட்சும் இந்த ரெண்டு பேரோட தான்.

பாரதி சிறுகுறிப்பு

பாரதிக்கு 'புதுச்சேரி' கொடுத்த 'கவிதை மகுடமும்”, 'கஞ்சா பழக்கமும்”

பாரதி கவிதையின் உச்சம் தொட்டது புதுச்சேரியில் வாழ்ந்த காலங்களில்தான்..அதே சமயம் தீய பழக்க வழக்கங்களுக்கு ஆளாகி இறுதிகாலத்தில் சீரழிந்ததும்  புதுச்சேரியில்தான்..  

 'இந்தியா” வார இதழ் அரசாங்கத்தின் அடக்கு முறையின் காரணமாக நின்றுபோய்விட அதன் பின்னரே புதுவையில் பாரதியின் படைப் புகள் யாவும் 'காட்டாற்று வெள்ளம் போல...” கணக்கின்றி வெளிவரத் தொடங்கின. 

வேதாந் தப் பாடல்கள், சக்திப் பாடல்கள்; பெண் விடுதலைப் பாடல்கள், சுய சரிதை, வசன கவிதை போன்ற தமிழின் உன்னதமான படைப்பு களும், 'கண்ணன் பாட்டு”, 'குயில்பாட்டு”, பாஞ்சாலி சபதம்” ஆகிய மூன்று சிறு காப்பியங்களும் ஏறக்குறைய இக்காலத்தில்தாம் வெளிவந்துதது.. 

மனித சமூகத்தின் விடுதலை வேட்கையையும், வாழ்வின் மகத்தான இலட்சியங்களையும், , நேர்ப்பட, அஞ்சாது பதிவுசெய்த இடம் புதுச்சேரி என்பதை அவனின் படைப்புகளே நமக்கு அறிவித்துக் கொண்டிருக்கின்றன.

 வறுமையின் காரணமாக பாரதி, தன் வீட்டை ஈஸ்வரன் தர்மராஜா கோயில் வீதியின் கோடியில் இருந்த 'விளக்கெண்ணெய்ச் செட்டியாரின்...” வீட்டுக்கு மாற்றிக் கொண்டுவிட்டிருந்தார். இந்தச் செட்டியார் பாரதியிடத்தில் வீட்டு வாடகை கேட்டதே கிடையாது. செட்டியார் வருவார். பாரதி பாடிக்கொண்டிருக்கும் பாட்டைக் கேட்பார். பிறகு மௌனமாய் வெளியே போய்விடுவார். பாரதி பேச்சுக் கொடுத்தால் ஒழிய செட்டியார் தாமாக ஒன்றும் பேச மாட்டார்.

இவரின் வீடுதான் பாரதிக்கு சங்கப் பலகை; கான மந்திரம்..அத்தகைய சிறப்புடைய விளக்கெண்ணைய்ச் செட்டியாரின் வீடு மட்டும் இல்லாது போயிருந்தால் பாரதியின் புதுச்சேரி வாசமும், அவனுடைய வாழ்க்கையும் பாழாய், பாலைவனமாய்ப் போயிருக்கும் என்பது நிதசர்னமான உண்மை…

வீட்டுத் தொல்லைகள் காரணமாகவும், அவற்றை மறக்கவும் புதுவை கடற்கரையில் பல நாட்கள் இரவெல்லாம் புலம்பியபடி கழித்தார்..:” தாயே பராசக்தி..! தீராத குழப்பம்.. எத்தனை நாட்கள்! எத்தனை மாதங்கள்! எத்தனை வருஷங்கள்!.

என்னைக் கடன்காரர் ஓயாமல் வேதனைப்படுத்திக் கொண்டிருந்தால், நான் அரிசிக்கும் உப்புக்கும் யோசனை செய்துகொண்டிருந்தால் உன்னை எப்படிப் பாடுவேன்...? எனது குடும்பப் பாரமெல்லாம் உன்னைச் சேர்ந்தது. உன்னைப் புகழ்ச்சிப் புரியும் தொழில் என்னைச் சேர்ந்தது.  ...” என கடற்கரையில் புகைத்துக்கொண்டிருந்த பாரதியைக் கண்டதாக வ.வே.சு.ஐயர், 'குறிப்பிடுகிறார்.. பாரதியாருக்குக் கஞ்சா சாப்பிடும் வழக்கம் புதுவை குள்ளச்சாமியின் பழக்கத்தால் ஏற்பட்டது...” என்றும் குறிப்பிடுகின்றார்.

அதுபோல, 'பாரதி புதையல்” மூன்றாம் தொகுதியில் பாரதியுடன் நெருங்கிப் பழகியவரும், புதுவையில் 'இந்தியா”, 'விஜயா”, 'கர்மயோகி” முதலிய பத்திரிகைகள் நடந்துவந்த காலத்தில் பாரதிக்குத் துணை புரிந்தவருமான பரலி சு. நெல்லையப்பர் எழுதியுள்ள கட்டூரையொன்றில் 'பாரதிக்கு வறுமையின் கொடுமையாலும், ஒரு சாமியாரின் கூட்டுறவாலும் புதுவையில் இருந்தபோது கஞ்சா பழக்கமேற்பட்டதும், அதனால் உடல் நிலை மோசமானது...” என்றும் அதனை உறுதி செய்கின்றார். 

இறுதிக்காலத்தில் யானை அடித்த காயத்தாலும்,கஞ்சா பழக்கத்தினால் ஏற்பட்ட உடல் நலிவாலுமே பாரதியின் உயிர் பிரிய நேரிட்டது..

பாரதியின் புதுச்சேரி வாழ்க்கை அவனுக்கு 'கவிதை மகுடத்தையும்”, 'கஞ்சா பழக்கத்தையும்” ஒரு சேர ஏற்படுத்தித் தந்தது அவன் வாழ்வின் விதியன்றி வேறு என்னவாக இருக்க முடியும்...?

பேரறிஞர் அண்ணா - மைக்கேல் ரானடே - போப்பாண்டவர்

பேரறிஞர் அண்ணாவுக்கு போப்பாண்டவரைச் சந்திக்க ஐந்து நிமிடம் ஒதுக்கப்பட்டது. 

மகாத்மா காந்தி பிறந்த இந்திய தேசத்தின் கடைக்கோடி மாநிலம் தமிழ் நாட்டின் முதல்வர் நான் என்று பேச ஆரம்பித்து தமிழர்களின் சிறப்பை எடுத்துச் சொல்லி ஐந்து நிமிடத்தில் தன் பேச்சை முடித்தார் அண்ணா.

போப்பாண்டவர் சொன்னார், அருமையாகப் பேசுகிறீர்கள் தொடர்ந்து பேசுங்கள்!  தொடர்ந்து அண்ணா ஐம்பத்தைந்து நிமிடம் பேசினார். அண்ணாவின் பேச்சில் சொக்கிப்போன போப்பாண்டவர் அண்ணாவுக்கு நன்றி தெரிவித்து உங்களுக்கு என்ன பரிசு வேண்டுமென்றார்.

என்ன கேட்டாலும் தருவீர்களா..என்று கேட்டார் அண்ணா.  கேளுங்கள் தருகிறேன் என்றார் போப்பாண்டவர். 

போர்ச்சுகல் தேசம் இந்தியாவின் கோவாவை ஆக்கிரமித்திருந்தது. போர்ச்சுகலின் ஆக்கிரமிப்பை எதிர்த்து போராடிய மைக்கேல் ரானடே இன்றைக்கும் போர்ச்சுகல் தலைநகரான லிஸ்பன் சிறையில் வாடுகிறார்.

உலக கிறிஸ்தவர்களின் தலைவரான நீங்கள் போர்ச்சுகலிடம் பேசி மைக்கேல் ரானடேவை விடுதலை செய்ய வேண்டும் என்று கேட்டார் அண்ணா. 

சரி என்று சொன்னார் போப்பாண்டவர். மகிழ்ச்சியோடு இந்தியா திரும்பினார் அண்ணா.

போப்பாண்டவரின் வேண்டுகோளை ஏற்று விடுதலை செய்யப்பட்ட ரானடே இந்திய தூதரகத்திடம் ஒப்படைக்கப்பட்டார். 

டெல்லி வந்த ரானடேவை வரவேற்க அன்றைய பிரதமர் அன்னை இந்திரா காந்தி விமானநிலையத்திற்குச் சென்றார். 

ரானடே அன்னை இந்திரா காந்தியிடம், யாருக்காகப் போராடினேனோ அந்த கோவா மக்களே என்னை மறந்துவிட்ட நிலையில் தமிழகத்தில் இருந்து என் விடுதலையை வேண்டிய திரு அண்ணாதுரை எங்கே என்று கேட்டார்.

அண்ணா மறைந்து விட்டார், அவர் கட்சியைச் சேர்ந்த பாராளுமன்ற உறுப்பினர் நாஞ்சில் மனோகரனை அழைத்து வந்திருக்கிறேன் என்று சொன்னார் அன்னை இந்திரா.

நாஞ்சிலாரைச் சந்தித்து விட்டு, நீங்கள் மிகவும் நேசிக்கும் கோவாவிற்கு செல்ல ஏற்பாடு செய்திருக்கிறேன் என்று சொன்னார் அன்னை இந்திரா.

நான் முதலில் செல்ல வேண்டிய இடம் கோவா அல்ல, அண்ணாவின் சமாதி தான் என்றார். அன்னை இந்திரா, ரானடே மற்றும் நாஞ்சிலாரை உடனடியாக சென்னைக்கு அனுப்பி வைத்தார்.

அண்ணா துயில் கொள்ளும் மெரினாவில் அழுது புரண்டான் ரானடே என்பது தமிழினம் மறந்த வரலாறு. 

போப்பாண்டவரிடம் தனக்கென எதுவும் கேட்காமல் ஒரு போராளியின் விடுதலை வேண்டிய மனிதநேய மாந்தர்தான் நமது பேரறிஞர் அண்ணா.

கிரேசி மோகன் பத்து நொடி, பத்து வெடி (சிரிப்பு).

Take things Easy, Life is Crazy.

😁

இப்பதானே தேள் கொட்டிடுச்சினு மருந்து வாங்கிட்டுப் போனீங்க? மறுபடி வந்து இருக்கீங்களே, எதற்கு?

இப்ப மருந்து கொட்டிடுச்சி.

😁

என் மனைவிக்கு தெரியாம நான் அவ பீரோவை திறந்ததை அவ பார்த்திட்டா...!!

அய்யோ...!! அப்பறம்?

“சாத்திட்டா”

😁

கடல்ல மூழ்கி தற்கொலை பண்ணிக்கப்போன பொண்ணைக்

காப்பாத்தினியே, அவ இப்போ எப்படி இருக்கா?

முழுகாம இருக்கா..!!!???....

😁

DOCTOR : கண் ஆபரேஷனுக்கு அப்புறம் உங்களுக்கு எப்படி

இருக்கு?

போயும் போயும்j இந்த நர்ஸையா சைட் அடிச்சோம்னு

தோணுது டாக்டர்…!

😁

"எம்பிளாய்மெண்ட் ஆபிசிலே நீ பதியறதுக்கு, உன்னோட அப்பா, தாத்தாவையும் கூட்டிட்டு வந்திருக்கியே! ஏன்?"

"அப்பாவுக்குப் புதுப்பிக்கணும்... எங்க தாத்தாவுக்கு முதல் இண்டர்வியூ வந்திருக்கு!"

😁

வரதட்சணையே வாங்கிட்டு கல்யாணம் செஞ்சது என் மனசை உறுத்திக்கிட்டே இருக்குது!

அதனால…?

வரதட்சணையே வாங்காம இன்னொரு கல்யாணம் செய்துகிட்டு பிராயச்சித்தம் செய்யப் போறேன்!

😁

"தம்பி உங்க பக்கத்து வீட்டு பெண் பாமாவை எங்க பையனுக்கு கேட்கலாம்னு இருக்கோம், பொண்ணு எப்பிடி?"

"நான் காதலிச்ச வரைக்கும் அந்த பொண்ணு நல்ல பொண்ணுதான் சார்"

😁

ஹீரோவுக்கும் தயாரிப்பாளருகும் என்ன வித்தியாசம்?

ஏழையா இருந்த ஹீரோ க்ளைமாக்ஸில்

கோடீஸ்வரனாகி விடுவான்,

கோடீஸ்வரனா இருந்த தயாரிப்பாளர், க்ளைமாக்ஸி’ல

ஏழையாயிடுவாரு…!

😁

"தினமும் காலையும், மாலையும் வந்து ஸ்டேசன்ல கையெழுத்து போட்டுட்டு போகணும் தெரியுதா?"

"சரிங்கய்யா, அப்புறம் வழக்கம் போலத் திருடப் போகலாமில்லே ஐயா?"

😁

💃🏽உங்க மனைவிய அடிக்கடி சினிமா பார்க்க தியேட்டருக்குக் கூட்டிக்கிட்டுப் போறீங்களே…..? அவங்க மேல அவ்வளவு பிரியமா .. .. ?

அட நீங்க ஒண்ணு .. .. ஒரு மூணு மணி நேரம் அவ பேசாம இருப்பாள்ல!!!

10 செகண்ட், 7 கதைகள்

#ஸீட்

தன் மகன், அரசுக் கல்லூரியில் இலவச ஸீட்  வாங்குவதற்காக, தனியார் பள்ளியில் அதிகப் பணம் கொடுத்து சேர்த்தார் தந்தை!

=============

#தமிழன்டா

சென்னையைவிட்டு அமெரிக்கா சென்ற நண்பன் சந்தோஷமாகச் சொன்னான்…"அங்கே நிறைய தமிழ் ஆளுங்க இருக்காங்கடா!"

=============

 #திருட்டு

"பென்சில் திருடினதுக்கு மிஸ் அடிச்சிட்டாங்க" எனக் கேவிக்கேவி அழுத மகளிடம், "திருடுறது தப்பு…'பென்சில் வேணும்'னு அப்பாகிட்ட கேட்டிருந்தா ஆபீஸில் இருந்து கொண்டு வந்திருப்பேன்ல!" என்றார் அப்பா.

=============

#பணம்

பள்ளிக் கட்டணம் கட்டாததால், மாணவியை வகுப்பறை வாசலில் நிற்கவைத்தாள்….இரண்டு மாதமாக சம்பளம் வாங்காத ஆசிரியை!

=============

#பழங்கதை       

தம்பிதானே….விட்டுக்கொடுப்பா" என மகனிடம் சொல்லிக்கொண்டிருந்தார் பழநி மலைக்கோயில் வரிசையில் நின்றிருந்த தந்தை!

=============

#அக்கறை

கோயில் திருவிழாவில் தன் குழந்தையைத் தவறவிட்டு 'காணவில்லை' என அழுதபடி தேடிக்கொண்டிருந்தவளின் இடது கையில் பத்திரமாக இருந்தது கைபேசி!

=============

#விதி

"துப்பாக்கியில் சைலன்ஸர் இருந்தும் எப்படி மாட்டிக்கிட்ட?" என்றான் சக கைதி. "செத்தவன் கத்திட்டானே!" என்று சோகமாகச் சொன்னான் கொலைகாரன்!

இளமையும் அரசியலும் - கவிஞர் விவேகா

‘கந்தசாமி’ படத்தில் கவிஞர் விவேகா எழுதிய ‘excuse me Mr.கந்தசாமி’ பாடல். 

சுச்சி மற்றும் விக்ரம் குரல்களில் பெப்பியான பாடல். காதலிக்கச்சொல்லி தொல்லை செய்யும் நாயகி, அவளை சமாளிக்கும் நாயகன் - இவர்களுக்குள்ளான உரையாடலைப் பாடலாக்கியிருப்பார்கள்.

‘வாலி’ வகை பாடல்கள் என்று தமிழ்சினிமாவில் ஒரு பாட்டுவகை இருக்கிறது. 

அதற்கு உதாரணமாக இந்தப் பாடலைச் சொல்லலாம். காரணம் இந்தப் பாடலுக்குள் இருக்கும் இளமையும் அரசியலும். 

ஹிட்லர் பேத்தியே ஹிட்லர் பேத்தியே காதல் ஒன்னும் யூதர் இல்லை கொல்லாதே, என்று சொல்லும் நாயகனுக்கு

லிங்கன் பேரனே லிங்கன் பேரனே தத்துவங்கள் பேசி பேசி கொல்லாதே, என்று நாயகி உலக அரசியல் சொல்வாள். 

கூடவே சேர்த்து இந்திய அரசியலும்

“காஷ்மீர் நான் நீ பாகிஸ்தான் தீராது டிஷ்யூம் தான்”

மிக முக்கியமான வரிகளாகச்  சொல்ல வேண்டியவை, இந்த ‘பெரியார்’ reference - வாலி வழி.

கடவுள் இல்லன்னு சொன்னார் ‘ராமசாமி’ 

காதல் இல்லன்னு சொல்றான் கந்தசாமி

இப்படிச் சொல்லும் நாயகனுக்கு நாயகி சொல்லும் பதில். 

“Noப்பா Noப்பா Noப்பா

சொன்னார் வள்ளுவர் Grandpa

ஊடல் தாண்டி கூடச்சொன்னார்

கடைசி குறளில் Sharpஆ”

இந்த வரியில் சொல்வதுபோல திருக்குறளின் கடைசிக் குறளில் அதாவது 1330வது குறளில் ஊடல் தாண்டிய கூடலைப் பற்றியும் அதன் இன்பத்தைப் பற்றியுமே எழுதியிருப்பார் வள்ளுவர்.

பால் : காமத்துப்பால்

அதிகாரம் : 133. ஊடலுவகை

குறள் எண் : 1330

“ஊடுதல் காமத்திற்கு இன்பம் அதற்கின்பம்

கூடி முயங்கப் பெறின்”

நானும் ஆசி பெற்றேன் - வாலி

T.S. ரங்கராஜன் அப்போது திருச்சி AIR - ஆல் இந்தியா ரேடியோவில் முக்கிய பணியில் இருந்தவர், சிலருக்கு மட்டுமே தெரிந்திருந்த நல்ல கவிஞர், அது மட்டும் அல்ல சிறந்த ஓவியரும் கூட. சிறுவயதில் ஒருமுறை அவர் அத்தை வீட்டின் உல் பிரகாரத்து பெரிய சுவரில் முழு ஓவியம் ஒன்றை வரைந்திருந்தார், ஊரிலே நல்ல பெயர் பெற்ற பெரிய குடும்பம் என்றதனால் மரியாதை நிமித்தமாக வீட்டிற்கு பலரும் வந்து செல்வார்கள்.  ஒருமுறை விருந்தினராக அவர்கள் வீட்டிற்கு வந்திருந்தார் ஒரு பெண்மணி, ரங்கராஜன் மற்றும் அவர் குடும்பத்தினருக்கும் அந்த பெண்மணியை பற்றி பெரிதும் அறிமுகம் கிடையாது ஆனால் மெட்ராஸ் மாஹணத்தில் இருந்து வருகிறார் விடுதலை போராட்டத்திற்கு போராடிய ஒருவரின் மனைவி என்று மட்டுமே அறிந்து இருந்தார்கள், வந்தவர்களை அழைத்து உபசாரணை செய்தார்கள், அங்கு வீட்டின் உள்ளே வந்ததும் ஓவியத்தை பார்த்து ரசித்து பின்பு நன்கு அழ ஆரம்பித்து விட்டார்.   

அந்த ஓவியம் வேறு யாரும் இல்லை காலம் நம்மிடம் இருந்து லாவகமாக பிரித்து சென்ற கவிஞர் சுப்ரமணிய பாரதியார் தான்,  ஐயமே வேண்டாம் வந்த அந்த பெண்மணி  நமது பாரதியின் மனைவி செல்லம்மாள் பாரதி தான்  

பின்னர் இதனை அறிந்ததும் நமது ரங்கராஜன், செல்லம்மாள் அவர்களின் காலில் விழுந்து ஆசி பெற்றார்.  

இந்த ரங்கராஜன் வேறு யாரும் இல்லை நம் அனைவர்க்கும் பரிச்சியமான வாலிப கவிஞர் வாலி தான்.

Subramaniya Bharathiyar  |  Actress Devayani (Film: Bharathi)  | Real Bharathiyar and Chellamal  |  Kavingar Vaali 

சுஜாதா'ஸ் படைப்பில் இருந்து

மிகவும் பிடித்த சுஜாதாவின் உரையாடல், அதற்கேற்ப காட்சி பதிவும் கூட (மணிரத்னத்திற்கும், ரவி கே சந்திரனுக்கும் ஒரு Gosh), நான் சிக்கிய சேனல் நிகழ்ச்சிகளுக்கு இடையே அத்திப்பூவை தோன்றியது.

இது சின்ன ஒரு Bike Drop Scene என்ன ஒரு 1 இல் இருந்து 2 நிமிடம் வரும் காட்சி, இதில் இவ்வளவும் சொல்லமுடியுமா???  கதாநாயகனின் அறிவையும், அவன் பால் கொண்ட காதலியின் நல்ல காதலையும், காமத்தின் அறிவியலையும் அனைத்தையும்  கொண்டு சென்று சமுதாயத்திற்கு மூன்று முடிச்சு போட்டுயிருப்பர்.

    மைக்கில் வசந்த் ஆக சூர்யா ; கீதாவாக ஈஷா தியோல்

"வீட்ல என்னடான்னா வேண்டாத ஆள கல்யாணம் பண்ணிக்க சொல்றாங்க. வேண்டிய ஆளு கல்யாணமே வேண்டாங்குறாரு" 

"உன் பெட்டியை எடுத்திட்டு என் வீட்ல வந்து இரு"
"எங்க? உன்  தங்கை ரூம்லயா அம்மா ரூம்லயா""என் ரூம்ல" 

"கல்யாணம் பண்ணிக்காமயா! பச்சை பாவம்"
"இதுல என்ன பாவம்! காதல் மட்டும் பாவமில்லையா" 

"காதல் புனிதம். பியூர் டிவைன்"
"காதல்னு ஒன்னு கிடையவே கிடையாது. doesn't exist""என்ன back அடிக்கிறியா" 

"நாம பொறந்ததெல்லாம்... நாமனா, நான், நீ, இதோ இந்த பச்சை சட்டை, மஞ்ச சுடிதார், இதோ இந்த போலீஸ்காரர் எல்லாரும் பிறந்தது எதுக்காக? இந்த காதல் கீதல் கண்ணீர் பாட்டு ஓவியம் இதெல்லாமே இருட்டுலயும் ஹோட்டல்லயும் பார்க்லயும் பெட்லயும் முடியுறதுக்காக. எல்லாம் ஹார்மோன் சம்பந்தப்பட்டது. ஹைட்ரொஜன், ஈஸ்ட்ரோஜன், டெஸ்டெஸ்ட்ரோன்,  ப்ரோஜெஸ்ட்ரோன் வெறும் ஓர்கானிக் கெமிஸ்ட்ரி. எக்ஸ் கிரோமோஸோம், வை க்ரோமோசோம், எக்ஸ் எக்ஸ், எக்ஸ்-வை . அவ்ளோதான் மேட்டர். 

கல்யாணங்கிற இன்ஸ்டிடியூஷன்லாம் சும்மா. சொஸைட்டிக்காக,, ஊர்ல ஒத்துக்கணும்னு... நாமதான் சொஸைட்டிக்காக எதுவுமே செய்றதில்லையே. இதை மட்டும் ஏன் செய்யணும்" 

"இப்ப என்னதான் செய்யணும்.?" 

"சிம்பிளா சொல்றன். உன்னை காதலிக்கிறேன்னு, நாம ரெண்டுபேரும் சேர்ந்து வாழலாம்னு, என் வீட்ல வந்து இருன்னு, என்கூட என்னை முழுசா சகிச்சிட்டு வாழ வர்றியானு கேட்கிறேன்." 

இது முடியும் போதே வைரமுத்து தன் கவிதையாலும் ரஹமான் தன் இசையாலும் நம்மை கவ்வி பிடிப்பார்கள். 

நெஞ்சம் எல்லாம் காதல் ...தேகமெல்லாம் காமம் உண்மை சொன்னால் என்னை நேசிப்பாயா...மஞ்சத்தின் மேல் மன்னிப்பாய 

அதான் நாகேஷ்

நகைச்சுவை மன்னன் நாகேஷ் அவர்களின் பிறந்த நாள் (27-09-1933) 

எத்தனை முறை பார்த்தாலும் அலுக்காத காமெடி, நாகேஷ் உயிரோடு இருக்கும் போதும் எந்த விருதும் தராமல் இருந்துவிட்டது நம் அரசு என்று நம் பத்திரிக்கைகள் எல்லாம் இப்போது புலம்புகின்றன. அதற்கு அவசியமே இல்லை, ஏனென்றால் ரசிகர்களின் நெஞ்சில் அவருக்கு இருக்கும் ஒரு அசையாத இடமே எல்லா விருதுக்கும் மேலானது.

நாகேஷின் இன்டர்வ்யூ ஹிந்து நாளிதழில் 2007 ம் வருடம் வந்தபோது , நாகேஷ் சொன்ன ஒரு விஷயம் அவர் நடிப்புக்கு அப்பாற்பட்டு ஒரு புத்திசாலி என்பதை நிரூபிக்கும்.

வாழ்க்கை மூன்று தளங்களில் இயங்குகிறது -

1) நீங்கள் விரும்பும் ஒன்று எனக்குப் பிடிக்கவில்லை, அதனால் உங்களுக்கு என்னைப் பிடிக்கவில்லை.

2) உங்களுக்கு குறிப்பிட்ட ஒன்று பிடிக்கவில்லை, ஆனால் நான் அதை விரும்புகிறேன். அதனால் உங்களுக்கு என்னைப் பிடிக்கவில்லை.

3) நீங்கள் எதையாவது விரும்புகிறீர்கள். அது எனக்கும் நிறைய பிடிக்கும்,  அதனால் உங்களுக்கு என்னை பிடிக்காது.

எனவே எப்படியிருந்தாலும், நம்மை விரும்பாதவர்கள் எப்போதும் இருப்பார்கள். நாம் விரும்பியதைச் செய்துவிட்டு முன்னே செல்ல வேண்டும்.

வாலிப வாலி

வாலியின் நறுக்குத்தெறித்ததாற் போன்ற சில சொற் சித்திரங்கள்…

ஒரு கவியரங்கில் கோவலன் வாழ்வை இரண்டு வரியில்..

"புகாரில் பிறந்தவன்

 புகாரில் இறந்தவன்"

காரைக்குடி கம்பன் விழாவில் அனுமனைப் பற்றி..

"குரங்கென அதன் வாலில் தீவைத்தானே

 கொளுத்தியது அவன் ஆண்ட தீவைத்தானே"

ஒரு கவியரங்க மேடையில், "திரைப்படத்தில் சில மோசமான பாடல்களை இயற்றுகிறீர்களே" என்ற கேள்விக்கு…

"எந்தப்பா திரைப்படத்தில் விலை பெறுமோ

 அந்தப்பா எழுதுகிறேன் இது என்தப்பா" 

என்று சொன்னதுடன்,

"நான் திரையரங்கில் பொருளுக்குப் பாட்டுரைப்பேன்,

 கவியரங்கில் பாட்டுக்குப் பொருளுரைப்பேன்" 

என்றும்,

"கவியரங்கில் வண்ண மொழி பிள்ளக்குத் தாலாட்டும் தாய்,

 திரையரங்கில் விட்டெறியும் காசுக்கு வாலாட்டும் நாய்" 

என பதில் கூறுகிறார்.

ஒரு ஆன்மீகக் கவியரங்கில் 'பிறப்பின் சுழற்சியை'...

"மண்ணிலிருந்து புழு புறப்பட்டது

 புழுவைப் பூச்சி தின்றது

 பூச்சியை புறா தின்றது

 புறாவை பூனை தின்றது

 பூனையை மனிதன் தின்ன

 மனிதனை மண் தின்றது

 மண்ணிலிருந்து மறுபடி

 புழு புறப்பட்டது

 புனரபி மரணம்

 புனரபி ஜனனம்

 பஜகோவிந்தம்

 நிஜகோவிந்தம்!" எனப் பாடுகிறார்.

புத்தகக் கண்காட்சியின்போது சுஜாதா

புத்தகக் கண்காட்சிக்கு செல்பவர்களுக்கு சுஜாதா சொன்ன பத்துக் கட்டளைகள்!  2009 ஆம் ஆண்டு புத்தகக் கண்காட்சியின்போது சுஜாதா சொன்ன பத்துக் கட்டளைகள் உங்களுக்காக..

1) என்ன புத்தகம் வாங்குவது என்று யாரிடமும் அட்வைஸ் கேட்காதீர்கள். நீங்கள் படித்த நல்ல புத்தகம் என்ன என்று வேண்டுமானால் கேட்கலாம். அது உங்களுக்கும் பிடிக்குமென்பது உறுதியில்லை.

2) படித்து முடிக்கவேண்டும் என்ற உறுதியோடு புத்தகம் வாங்குங்கள். உங்கள் அலமாரியின் எடைகூட்டவோ, அடுக்கி வைத்து அழகு பார்ப்பதற்கோ புத்தகம் வாங்காதீர்கள். அது பர்ஸுக்கு வந்த கேடு.

3) வாங்கும் புத்தகம் எதைப் பற்றி எழுதப்பட்டிருக்கிறதோ.. அந்த சப்ஜெக்டை, எழுதிய ஆசிரியர் குறித்து கொஞ்சமாவது தெரிந்து கொண்டு வாங்குங்கள். ‘சுடிதார் தைப்பது எப்படி? - சுஜாதா விளக்கம்’ என்று அட்டையில் கண்டால், ‘சுஜாதாவுக்கு சுடிதார் தைப்பது பற்றி என்ன தெரியும்?’ என்று கடந்து போய்விடுங்கள்.

4) உங்கள் தனிப்பட்ட வாசிப்பு அடர்த்தியானதா, லைட் ரீடிங்கா என்று தெரிந்து வைத்துக் கொண்டு அதற்கேற்ற புத்தகங்களாக வாங்குங்கள்.

5) வாங்கிய புத்தகங்களை இத்தனை நாட்களுக்குள் படித்து முடிப்பேன் என்று உறுதியோடு படிக்க ஆரம்பியுங்கள். இப்போதெல்லாம் ‘பல்லைக் கடித்துக் கொண்டு இத்தனாம் பக்கம்வரை படித்தால், அதன் பிறகு ஸ்பீடெடுத்து முழுதும் படித்துவிடலாம்’ என்கிற ரேஞ்சில் பல புத்தகங்கள் வருகின்றன. நான் சமீபத்தில் படித்த புத்தகத்தை, ‘132வது பக்கம் வரை எப்படியாவது படியுங்கள்’ என்று கொடுத்தார் நண்பர். பாக்கி இருந்தது ஒரே ஒரு பக்கம். அதுவும் குறிப்புகளுக்கு. அதில் ‘வேஸ்ட்’ என்று எழுதி, புத்தகத்தைப் பரணில் போட்டுவிட்டேன்.

6) முற்றிலும் நீங்கள் அறியாத விஷயங்கள் குறித்த புத்தகம் ஒன்றேனும் வாங்கிவிடுங்கள். அது ஏலியன்ஸ் பற்றியதாக இருக்கலாம், கார்ப்பரேட் கம்பெனிகள் குறித்த ரகசியங்களாக இருக்கலாம். இந்த வருடம் புதிதாக ஒரு சப்ஜெக்டைத் தொடப்போகிறேன் என்று ஆரம்பியுங்கள்.

7) கவிதை என்றொரு சிக்கலான சமாச்சாரம் இருக்கிறது. அதைப் பற்றிப் படிப்பதாக இருந்தால் மட்டும், ஒன்றிரண்டைப் புரட்டிப் பார்த்து புரிகிறதா என்று சோதித்துவிட்டு வாங்குங்கள். ‘ஓடியோடி வந்து போகும் ஊழ்வினை போல பிரபஞ்சமெனும் கடலிலிருந்து வண்ணப் பிம்பத்தை வெளிச்சமாய் வீசியபடி..’ என்றெல்லாம் ஜல்லியடிக்கிற கவிதைகளின் படிமங்கள், பரிமாணங்கள் எல்லாம் உங்களைக் குழப்பினால் ‘உன் கண்களில் மீன்.. கனவினில் நான்’ டைப் கவிதைகளுக்கே போகலாம். ஆனால் என் அட்வைஸ் என்னவென்றால்….. வேண்டாம்.

8) சின்ன சைஸ் புத்தகங்களை முழுவதும் ஸ்டாலுக்குள்ளேயே நின்று படித்து முடிக்கிற பிரகஸ்பதிகளைப் பார்க்கிறேன். அவர்களின் வங்கிக் கடன் வட்டிவிகிதம் உயரும் என்று ஐத்ரேய உபனிஷத்தில் எழுதப்பட்டிருக்கிறது.

9) திரும்பத் திரும்ப சொல்வதுதான். குழந்தைகளுக்கு வாசிப்பை போதியுங்கள். கட்டாயமாக்காமல், படிக்கும் ஆர்வம் அவர்களுக்காக வர ஆவன செய்யுங்கள். அதற்கு அவர்கள் வீட்டில் இருக்கும்போது செல்ஃபோனை நோண்டாமல், நீங்களும் தினமும் ஒன்றிரண்டு மணிநேரம் புத்தகம் வாசிக்க வேண்டும்.

10) முக்கியமாக ’சுஜாதா சொன்னார்’ என்று என் ஸ்டைலிலேயே எவனாவது எழுதியதை அப்படியே பின்பற்றாமல், அவை சரியா என்றாராய்ந்து பின்பற்றுங்கள்.

விருமாண்டி - பெத்தராசு

பெத்தராசு, "போலீஸ் வந்திருச்சு, Inspector பேய்காமன் வந்திருக்கான்"

பேக்காமன்:  நீங்களும் விருமாண்டிய தான சந்தேகப்பட்றீக… FIR எழுதனும்ல 

Advocate பால்பாண்டி: ஆமா,பெத்தராசு, நைனாவ கொன்டவர கண்டுபிடிச்சி தான ஆகனும், விருமாண்டி எங்க இருக்கான்னு உங்களுக்கும் தெரியும்ல… 

பெத்தராசு: Mr.பால்பாண்டி உங்க அளவுக்கு பெரிய வக்கீல் இல்லனாலும், நானும் வக்கீல் தான், ஆனா நேர்மையான வக்கீல், அப்டி தான் இருக்கனும்னு எங்க நைனா சொல்லிருக்கார், So if you don't mind, 

பால்பாண்டி: சரி…சரி நீங்க பேசுங்க.. 

பெத்தராசு: எங்க நைனாவ கொன்னது யாருனு எனக்கு தெரியும்.. 

பேக்காமன்: யாரு…? 

பெத்தராசு: உனக்கும் தெரியும்.. கடசில சத்தியம் தான் ஜெயிக்கும்னு எங்க நைனா சொல்லிருக்கார், அத நான் இன்னிக்கு வரைக்கும் follow பண்ணிட்டு தான் இருக்கேன், விருமாண்டிக்கு எதிரா என் ஊர்ல இருந்து ஒரு புள்ள கூட சாட்சி சொல்லாது,  நாம என்ன பேசிட்ருக்கோம்னு இங்க எல்லாத்துக்கும் தெரியும், உனக்கு ஒரு மரியாதைக்காக தான் தனியா கூப்ட்டு பேசிட்ருக்கேன், 10 போலீஸ்காரன அடிச்சு தூக்கி எரிஞ்சுட்டு, போலீஸ் ஸ்டேஷன கொழுத்திட்டு ஜெயிலுக்கு போக எல்லாம் தயாரா இருக்கோம், ஆனா எங்க நைனாவோட இறுதி ஊர்வலம் கெளரவமா நடக்கனும்ஙகறதுக்காக தான் அமைதியா போறோம், தெரிஞ்சுக்கோ…🔥🔥🔥

"பெத்தராசு"

விருமாண்டி படத்துல எனக்கு ரொம்ப பிடிச்ச ஒரு கதாப்பாத்திரம், படத்த எத்தன தடவ பாத்திருப்பனோ அத விட அதிகமான தடவ இந்த சீன பாத்திருப்பேன்,

கமல் சாருக்கு கூட, இவ்ளோ Mass-அ ஒரு சீன் இருந்ததானு தெரில எனக்கு..

"விருமாண்டிக்கு எதிரா என் ஊர்ல இருந்து ஒரு புள்ள கூட சாட்சி சொல்லாது"னு அவர் சொல்லும் போது…அப்ப்பா…

இந்த சீனையும், இந்த character-ஐயும் ஏன் முக்கியமா பேசனும்னு தோனுச்சுனா..

இந்த பெத்தராசு character-அ 

நல்லம நாயக்கர் தன் மகன்னு beginning Panchayat scene-ல introduce பண்ணிருப்பார், இப்புடி

"என் மகன் பெத்தராசு…

நெதம் கோர்ட் வாசல மிதிச்சிட்ருக்கான், 

ஏன்னா வக்கீலுக்கு படிச்சிருக்கான்"

பெத்தராசு படத்துல first Dialogue பேசுறது படத்துடைய 2hr 18th Minல தான்,

படம் full-அ பேசாம, ரொம்ப silent-அ  

subtle-அ ருக்குற ஒரு characterக்கு இப்புடி ஒரு சீன் வைக்குறது இருக்குல..

எப்பவுமே, 

எழுத்தாளர்- இயக்குனர் கமல்ஹாசன், தன்னுடைய கதாப்பாத்திரங்கள எழுதுற விதமும், ஒவ்வொரு காட்சியையும் stage பண்ற விதமும், ஒவ்வொரு Aspiring Filmmakersக்கும் MASTER CLASS தான்..

Pic & Credits: Reminding this through my Facebook page friend 

எப்படி வேணாலும் மாறலாம், இல்லையா? யாருக்குத் தெரியும் - பரியேறும் பெருமாள்

“தம்பி.. உன்கிட்ட ஒன்னு கேட்பேன். மறைக்காம சொல்லனும்.”

“சொல்லுங்க சார்.”

“நாங்க இவ்ளோ பண்ணியிருக்கோம்ல? நீ ஏன் என் பொண்ணுகிட்ட சொல்லவே இல்ல?”

“உங்களுக்கொன்னு தெரியுமா சார்? உங்க பொண்ணுக்கு என்ன விட உங்களதான் சார் ரொம்ப புடிக்கும். எனக்கு கிடைச்சமாதிரி அப்பா வேற யாருக்கும் கிடைச்சிருக்க மாட்டாங்கன்னு ரொம்ப சந்தோசமா சொல்லிக்கிட்டே இருப்பா. அதான் சொல்லல.”

“தேங்க்ஸ் பா. எனக்கும் தெரியும் தம்பி. என் பொண்ணுக்கு என்னைய எவ்வளோ புடிக்குமோ, அதே அளவுக்கு உன்னையும் புடிக்கும். அது மட்டுமில்ல. அவ உன்கூடயே இருக்கனும்னு ஆசப்படுறாங்குறதும் தெரியும்.

தம்பி, என் பொண்ணு உன் மேல இவ்வளவு பைத்தியமா இருக்கால்ல. அதேமாதிரி அவ மேல உனக்கு எந்த நினைப்பும் வரவே இல்லையா?”

“ தெரில சார். அது என்னன்னு தெரிஞ்சுக்கிறதுக்குள்ள தான் நாய அடுக்கிற மாதிரி அடிச்சு, ரத்தம், சதைன்னு குத்திக் கிழிச்சுட்டீங்களே.

ஆனா உங்கப் பொண்ணு ரொம்ப கொடுத்து வெச்சவ சார். அவ நெனச்சத நெனச்ச இடத்துல பேச முடியுதுல்ல. ஆனா, என்ன பாருங்க. நான் என்ன நினைச்சேன்னு சொல்றதுக்கே செத்துத் தொங்க வேண்டியதா இருக்கு.”

“சாரி ப்பா. நீ ரொம்ப நல்ல பையன். நீ ஆசப்பட்டது மாதிரியே வாழ்க்கையில பெரிய ஆளா வருவ. நல்லா படி. இப்போதைக்கு என்னால இத தான் சொல்ல முடியும். வேற என்ன சொல்றது?

பாக்கலாம். நாளைக்கு எது வேணாலும் எப்படி வேணாலும் மாறலாம், இல்லையா? யாருக்குத் தெரியும்.”

“எனக்குத் தெரியும் சார். நீங்க நீங்களா இருக்குற வரைக்கும், நாங்க நாயாதான் இருக்கனும்னு நீங்க எதிர்பாக்குற வரைக்கும், இங்க எதுவுமே மாறாது. இப்படியேதான் இருக்கும்.”  - பரியேறும் பெருமாள்

பாரதி சிறுகுறிப்பு - வ.உ.சி.யை வாழ்த்தியவன் - மக்களின் செயலறிந்து இகழ்ந்து நொந்தான்

‘வேளாளன் சிறை புகுந்தான் தமிழகத்தார்
மன்னனென மீண்டான்’ என்றே
கேளாத கதை விரைவில் கேட்பாய் நீ!’
என்று சிறைசென்றபோது வ.உ.சி.யை வாழ்த்தியவன் பாரதி. சிறையிலிருந்து வெளிவந்தபோது, அந்த மகத்தான மனிதனை நாடு மறந்துவிட்டதைப் பார்த்து நெஞ்சு பொறுக்காமல் நிலைகுலைந்தது பாரதியின் இதயம்.

‘பிள்ளைவாள்,
அந்தக் கப்பல்களை
வெள்ளைக்காரனுக்கே
விற்றுவிட்டார்களாமே…
அதைவிட
சுக்கல்சுக்கலாய் உடைத்து
கடலில் கரைத்திருக்கலாமே…’
என்று கொதிக்கிறான் பாரதி, தன்னைப் பார்க்க புதுச்சேரிக்கு வந்த வ.உ.சி.யிடம்!

‘மாமா, உங்களுக்குத் தெரியாதா,
மானங்கெட்ட நாடு இது’ என்கிறார் வ.உ.சி.

‘நாட்டை இகழாதீர்கள்…..
மானம் கெட்ட மக்கள் பிள்ளைவாள்…’
என்று அந்த நிலையிலும் திருத்துகிறான் பாரதி, தேசத்தை விட்டுக் கொடுக்காமல்!

அதற்குப் பிறகாவது நாம் திருந்திவிட்டோமா? மனம் நொந்துபோய், பாரதிக்கே அதைத் திருப்பிச் சொல்ல வேண்டியிருக்கிறது…..

‘நாங்கள் மானங்கெட்ட மக்கள், பாரதி!’

https://www.commonfolks.in/books/d/bharathi-kaithi-enn-253
Courtesy: http://irruppu.com/?p=93384

பாரதி சிறுகுறிப்பு - அகவை 37 அடைந்த தருணம் - கைதி எண் 253

பிரிட்டிஷ் அரசுக்கு எதிரான கருத்துக்களைத் தொடர்ந்து வெளியிட்டு வந்த ‘இந்தியா’ பத்திரிகையின் சட்டப்பூர்வ ஆசிரியர் சீனிவாசன் 1908ல் கைது செய்யப்படுகிறார். உண்மையான ஆசிரியரான பாரதியும் கைதுசெய்யப்பட்டுவிடுவார் என்கிற நிலை. பிரிட்டிஷ் அரசின் வலையிலிருந்து தப்பிக்க, வ.உ.சி. உள்ளிட்ட நண்பர்களின் வற்புறுத்தலால், புதுச்சேரி போய்விடுகிறார் பாரதி. (புதுச்சேரி அப்போது பிரெஞ்சுக் காலனி.)

புதுச்சேரி பிடித்திருந்தாலும் ‘ஹோம் சிக்’ வதைத்துக் கொண்டே இருக்கிறது

பாரதியை! எப்படியாவது தமிழகத்துக்குத் திரும்பிவிடத் துடிக்கிறார். 1918 நவம்பர் 20ம் தேதி புதுவையிலிருந்து புறப்பட்டு விடுகிறார். இந்தியப் பகுதிக்குள் நுழைந்தவர், கடலூருக்கு அருகே கைதுசெய்யப்படுகிறார். 4 நாள் கடலூர் துணைச் சிறைக்கூடத்தில் வைக்கப்பட்டிருந்தவர், 24ம் தேதி கடலூர் மாவட்ட தலைமைச் சிறைக்கூடத்துக்கு மாற்றப்படுகிறார். 25 நாள் சிறைவாசத்துக்குப் பின், டிசம்பர் 14ம் தேதி விடுதலை செய்யப்படுகிறார். அது, 37வது வயதில் அவர் அடியெடுத்துவைத்த நான்காவது நாள்.

அந்த 25 நாட்களில் சிறைக்கம்பிகளுக்குப் பின்னிருந்து பழைய நிகழ்வுகளையும் நினைவுகளையும் கனவுகளையும் உணர்வுகளையும் பாரதி நினைத்துப் பார்ப்பதாக விரிகிறது – கைதி எண் 253. பாரதியின் கவிதைகளையும் சிந்தனைகளையும் பொருத்தமான இடத்தில் பொருத்தி, வியக்க வைக்கிறார் எழுத்தாளர்  சிற்பி.

இது சிற்பி எழுதியதா, பாரதி எழுதியதா என்கிற சந்தேகமே வந்துவிடுகிறது பல இடங்களில்!

https://www.commonfolks.in/books/d/bharathi-kaithi-enn-253
Courtesy: http://irruppu.com/?p=93384

முதல் லெட்டர் - பிரபா ஆனந்தி

#KatradhuTamizh #TamizhMA

என் வாழ்க்கைல வந்தது மூணே மூணு letter,  Still I Remember my first letter

பிரபா,

நீ என்னை தேடியிருப்பேன்னு எனக்கு தெரியும், நானும் அம்மாவும் இங்க maharashtra'ல தூரத்து மாமா வீட்டுல இருக்கறோம்.  நீ வர்றதுக்கோ letter எழுதறதுக்கோ ஏத்த சமயம் வர்றப்ப நான் சொல்றேன்.

நேரத்துக்கு சாப்பிடு,

வாரத்துக்கு மூணு நாளாவது குளி,

அந்த socks'ah  துவைச்சு போடு,

நகம் கடிக்காத,

கடவுள வேண்டிக்கோ!

- ஆனந்தி

மௌன பூகம்பம்

இது வைரமுத்து எழுதிய குறுங் காதல் கதை… ஆகா சிறந்த வர்ணனை, முடிவு சற்று எதிர் பாராததுவே…

வைரமுத்து

அவளின் ஞாபகங்களே அவனுக்குச் சுவாசம்
பன்னிரண்டு பாலைவன வருஷங்களுக்குப் பிறகு
அவளை அவன் பார்க்க நேருகிறது.
எங்கெனில்..
ஒரு ரயில் நிலையத்தில்.

எப்பேதெனில்..
ஒரு நள்ளிரவில்.

எதிரெதிர் திசையில் செல்லும் ரயில்கள் இளைப்பாறிக்
கொள்ளும் அந்த இடைவெளியில்..

ரயில்களின் எதிரெதிர் பெட்டிகளில்
பழைய கண்கள் நான்கு பார்த்துக் கொள்கின்றன.

அப்பொழுது-
மனசில் எத்தனை மௌன பூகம்பம்!)
உன்னைப் பார்த்த
ஒரு நிமிஷத்தில்
இமைகளைக்
காணாமல் போட்டு விட்டன
கண்கள்.

நீதானா?
இல்லை-
வேறொருவன் கண்களால்
நான்
பார்க்கிறேனா?

மனசின் பரப்பெங்கும்
பீச்சியடிக்கும் ஒரு
பிரவாகம்.

இதயத்தின்
ஆழத்தில் கிடந்த
உன்முகம்
மிதந்து மிதந்து
மேலே வருகிறது.

ஓ!
வருஷங்கள் எத்தனையோ
வழிந்த பிறகும்..
என்
மார்பு தடவும்
அதே பார்வை..

அதே நீ!

என் பழையவளே!

என்
கனவுகளில் அலையும்
ஒற்றை மேகமே!

உன் நினைவுகளில்
நான்
எத்தனையாவது பரணில்
இருக்கிறேன்?

அறிவாயா? என்
மீசைக்கும்
என்
காதலுக்கும்
ஒரே வயதென்று
அறிவாயா?

உன் பெயரை
மறக்கடிப்பதில்
தூக்க மாத்திரை கூடத்
தோற்றுப் போனதே!

ஓ!
நீ மாறியிருக்கிறாய்.
உன்
புருவ அடர்த்தி
கொஞ்சம்
குறைந்திருக்கிறது.

உன்
சிவப்பில் கொஞ்சம்
சிதைந்திருக்கிறது
உன்
இதழ்களில் மட்டும்
அதே
பழைய பழச்சிவப்பு.

இப்போதும்
நாம்
பேசப்போவதில்லையா?

வார்த்தைகள் இருந்தபோது
பிரிந்து போனவர்கள்
ஊமையான பிறகு
சந்திக்கிறோமா?

உன் நினைவுகள்
உன் கணவனைப் போலவே
உறங்கியிருக்கலாம்.
ஆனால்
என் நினைவுகள்
உன்னைப் போலவே
விழித்திருக்கின்றன.

ஓ!
இந்த
ரயில் வெளிச்சம்
நீ
அழுவதாய் எனக்கு
அடையாளம் சொல்கிறதே!
வேண்டாம்!

விழியில் ஒழுகும்
வெந்நீரால்
மடியில் உறங்கும்
உன்
கிளியின் உறக்கத்தைக்
கெடுத்து விடாதே!

இதோ
விசில் சத்தம் கேட்கிறது
நம்மில் ஒரு வண்டி
நகரப் போகிறது.

போய் வருகிறேன்!
அல்லது
போய்வா!
மீண்டும் சந்திப்போம்!
விதியை விடவும்
நான்
ரயிலை நம்புகிறேன்.

அப்போது
ஒரே ஒரு கேள்விதான்
உன்னை நான் கேட்பேன்!

"நீயும் என்னைக்
காதலித்தாயா?"

சுஜாதா தாட்ஸ் பற்றி கரு. பழனியப்பன்

சுஜாதா தாட்ஸ் பற்றி ஒரு மேடையில் இயக்குனர் - எழுத்தாளர்

கரு. பழனியப்பன் அவர்கள் கூறியது

சுஜாதா 

1. ஏதாவது ஒன்றின் மீது அசைக்க முடியாத நம்பிக்கை வையுங்கள். அது கடவுளாகவோ அல்லது இயற்கையாகவோ அல்லது உழைப்பாகவோ இருக்கலாம். கேள்வி கேட்காதா நம்பிக்கை, ஏன் என்றால் அரசியல், விஞ்ஞானம் எல்லாம் கேள்வி கேட்டுக் கொண்டே குழம்பி நிற்கிறது

2. ஒரு மாறுதலுக்கு அப்பா, அம்மா கொடுக்கும் வேலைகளில் ஏதாவதை செய்து பாருங்கள். ரொம்ப கடினமான வேலையாக நிச்சயம் இருக்காது. காபி பவுடர் வாங்குவதிற்கும், சில்லரை சாமான் வாங்குவதற்காக இருக்கலாம்.

கரு. பழனியப்பன்

3. மூனு மணி ஆரம்பிக்கும் மேட்னி ஷோ போகாதீர்கள். படிப்பு கெடும், தலையை வலிக்கும். பொய் சொல்ல கஷ்டமாக இருக்கும்.

4. தினமும் நாலு பக்கமாவது படியுங்கள், இதில் காதல், கதை அடங்காது.

5. குறைந்த பச்சம் ஐந்து ரூபாயாவது சம்பாதிக்க முயற்சி செய்து பாருங்கள், அப்பாவிடம் ஜீன்ஸ், டி-ஷர்ட் கேட்பதற்கு முன்பு

6. உங்களுக்குக் கீழே உள்ள சராசரி அடித்தட்டு மக்களைப் பற்றி கொஞ்ச நேரமாவது சிந்தியுங்கள்.

7. ஞாயிறு - பெற்றோர்களோடு செலவழிக்கும் தினமாக இருக்கட்டும், கண்டிப்பாகக் காதல் மட்டும் வேண்டாம், ஏன் என்றால் காதல் தேவை இல்லாத சில இடங்களில் காத்திருக்க வைக்கும், பலர் கண்ணில் அகப்பட்டுக் கொள்வோம்

8. எட்டு முறையாவது ஒரு கிரவுண்டை சுற்றி வாருங்கள், எதயவுது ஆர்வத்துடன் விளையாடுங்கள், இதில் கம்ப்யூட்டர் கேம்ஸ் அடங்காது. வியர்வைச் சிந்த விளையாடினால் நல்ல தூக்கம் வரும், வீண் சிந்தனைகள் வராது.

9. ஒன்பது மணிக்குள் வீட்டுக்கு வந்து விடுங்கள். அதிக பச்சம் ஒன்பது : ஐந்துக்கு எல்லாம் வீடு சேர்ந்துருங்க, ஏன் என்றால் இரவு தான் பல தவறுகளுக்கு காரணமாக இருக்கிறது.

10. ஒரு நாளில் பத்து நிமிடமாவது குடும்ப உறுப்பினர்கள் யாரோடாவது அரட்டை அடியுங்கள். நடந்தது, நடக்காதது எதையாவுது பேசி நேரத்தை செலவிடுங்கள்

இதில் ஏதாவது ஒன்றைத் தினம் செய்து வாருங்கள். நீங்களும் நிம்மதியாக இருப்பீர்கள்

யார் தான் கடவுள்?

யார் தான் கடவுள் என்று எழும்பிய கேள்விக்கு கண்ணதாசன் கூறிய கவிதை பதில்...

பிறப்பின் வருவது யாதெனக் கேட்டேன்
பிறந்து பாரென இறைவன் பணித்தான்!

படிப்பெனச் சொல்வது யாதெனக் கேட்டேன்
படித்துப் பாரென இறைவன் பணித்தான்!

அறிவெனச் சொல்வது யாதெனக் கேட்டேன்
அறிந்து பாரென இறைவன் பணித்தான்!

அன்பெனப் படுவது என்னெனக் கேட்டேன்
அளித்துப் பாரென இறைவன் பணித்தான்!

பாசம் என்பது யாதெனக் கேட்டேன்
பகிர்ந்து பாரென இறைவன் பணித்தான்!

மனையாள் சுகமெனில் யாதெனக் கேட்டேன்
மணந்து பாரென இறைவன் பணித்தான்!

பிள்ளை என்பது யாதெனக் கேட்டேன்
பெற்றுப் பாரென இறைவன் பணித்தான்!

முதுமை என்பது யாதெனக் கேட்டேன்
முதிர்ந்து பாரென இறைவன் பணித்தான்!

வறுமை என்பது என்னெனக் கேட்டேன்
வாடிப் பாரென இறைவன் பணித்தான்!

இறப்பின் பின்னது ஏதெனக் கேட்டேன்
இறந்து பாரென இறைவன் பணித்தான்!

அனுபவித்தேதான் அறிவது வாழ்க்கையெனில்
ஆண்டவனே நீ ஏன்' எனக் கேட்டேன்!
ஆண்டவன் சற்றே அருகு நெருங்கி
அனுபவம் என்பதே நான்தான்' என்றான்!

யாருக்கு விதி?எங்கே எப்படி முடியும்!!!

படித்ததில் பிடித்தது

இந்திரன்மனைவி இந்திராணி ஒரு கிளியை மிகவும் பிரியமாகவளர்த்துவந்தாள்.  ஒருநாள் அந்த கிளி நோய்வாய்ப்பட்டுவிட்டது.  அதை பரிசோதித்த மருத்துவர் இனி அது பிழைக்காது என்று கூறிவிட்டார்.  உடனே தன் கணவனை அழைத்த இந்திராணி,  இந்த கிளியை எப்படியாவதுக்காப்பாற்றுங்கள், கிளி இறந்துவிட்டால் நானும் இறந்துவிடுவேன் என்றாள்.

இந்திரன்,  கவலைப்படாதே இந்திராணி...நான் உடனே பிரம்மாவிடம்சென்று முறையிடுகிறேன்...

ஒவ்வொருவரின் தலையெழுத்தையும் எழுதுபவர் அவர்தானே?  அவரிடம்சென்று கிளியின் தலையெழுத்தை மாற்றியெழுதிவிடுவோம் என்று சொல்லிவிட்டு

பிரம்மாவிடம் சென்று விஷயத்தை கூறினான்..

விஷயத்தைக்கேட்ட பிரம்மா ,  இந்திரா.... படைப்பது மட்டுமே என்வேலை.  உயிர்களை காப்பது சாட்சாத் மஹாவிஷ்ணுவின் தொழில்.  நாம் அவரிடம்சென்று உதவிகேட்போம்...வா ...நானும் உன்னுடன் வருகிறேன் என்று இந்திரனை அழைத்துக்கொண்டு

மஹாவிஷ்ணுவிடம்சென்று விஷயத்தை தெரிவித்தார் பிரம்மா.

மஹாவிஷ்ணுவோ, உயிர்களை காப்பது நான்தான். ஆனால் உன் கிளி இறக்குந்தறுவாயிலிருக்கிறது.  அழிக்கும்தொழிலை மேற்கொண்ட சிவன் தான் அதைக்காப்பாற்ற வேண்டும்.  வாருங்கள் நானும் உங்களுடன்வந்து சிவனிடம் பேசுகிறேன் என்று கிளம்பினார் விஷ்ணு.  விபரங்களைக்கேட்ட சிவன் , அழிக்கும் தொழில் என்னுடையதுதான்.

உயிர்களையெடுக்கும்பொறுப்பை நான் எமதர்மராஜனிடம் ஒப்படைத்துள்ளேன்.  

வாருங்கள்....  நாம் அனைவரும்சென்று எமதர்மனிடம்கூறி அந்த கிளியின் உயிரை எடுக்கவேண்டாம் என்று சொல்லிவிடுவோம் என்றுசொல்லி அவர்களை அழைத்துக்கொண்டு எமலோகம் செல்கிறார் சிவன்.

தன்னுடைய அவைக்கு சிவன், மஹாவிஷ்ணு, பிரம்மா, இந்திரன் ஆகிய நால்வரும் வருவதைக்கண்ட எமதர்மன் உடனே எழுந்து ஓடிவந்து வரவேற்கிறார். விஷயம் முழுவதையும்கேட்ட அவர், ஒவ்வொரு உயிரையும் எந்தநேரத்தில், எந்தசூழ்நிலையில், என்னகார‌ணத்தால் எடுக்கவேண்டும் என்ற காரணத்தை ஒரு ஓலையில் எழுதி ஒரு பெரிய அறையில் தொங்கவிட்டுவிடுவோம்.  அந்த ஓலை அறுந்துவிழுந்துவிட்டால், அவரின் ஆயுள் முடிந்துவிடும். வாருங்கள் அந்த அறைக்குச்சென்று, கிளியின் ஆயுள் ஓலை எது என்று பார்த்து , அதை மாற்றி எழுதிவிடுவோம் என்று அவர்களை அழைத்துச்செல்கிறார்.  இப்படியாக இந்திரன், பிரம்மா, விஷ்ணு, சிவன், எம்தர்மன் ஆகிய ஐவரும் அந்த அறைக்குச்சென்றனர்.

அவர்கள் உள்ளே நுழைந்தவுடன் ஒரு ஓலை அறுந்து விழுகிறது.  உடனே அவர்கள் அவசரமாகச்சென்று அந்த ஓலையை எடுத்து பார்க்கின்றனர்.

அது அந்த கிளியின் ஆயுள் ஓலை.

அவசரமாக அதை படித்துப்பார்க்கின்றனர்.... அதில்,,,

இந்திரன், பிரம்மா, விஷ்ணு, சிவன், எம‌தர்மன் ஆகிய ஐவரும் எப்போது ஒன்றாக இந்த அறைக்குள் நுழைகிறார்களோ அப்போது இந்த கிளி இறந்துவிடும்.. என்று எழுதப்பட்டிருந்தது.

இதுதான் விதி!!  விதியை மாற்றுவது என்பது முடியாது என்பதே கதை?!

யாருக்கு விதி?!!

எங்கே எப்படி முடியும்!!!

என்பது எழுதினவனுக்கே 

தெரியாது என்பது தான் உண்மை?!  

தூர் – நா.முத்துக்குமார் - சுஜாதாவின் பாராட்டு

“வேப்பம் பூ மிதக்கும்
எங்கள் வீட்டு கிணற்றில்
தூர் வாரும் உற்சவம்
வருடத்துக்கு ஒரு முறை
விஷேசமாக நடக்கும்.

ஆழ் நீருக்குள்
அப்பா முங்க முங்க
அதிசயங்கள் மேலே வரும்...
கொட்டாங்குச்சி, கோலி, கரண்டி,
துருப்பிடித்தக் கட்டையோடு
உள் விழுந்த ராட்டினம்,

வேலைக்காரி திருடியதாய்

சந்தேகப்பட்ட வெள்ளி டம்ளர்...

எடுப்போம் நிறையவே!

‘சேறுடா சேறுடா’ வென

அம்மா அதட்டுவாள்

என்றாலும்

சந்தோஷம் கலைக்க

யாருக்கு மனம் வரும்?

படை வென்ற வீரனாய்

தலைநீர் சொட்டச் சொட்ட

அப்பா மேலே வருவார்.

இன்று வரை அம்மா

கதவுக்குப் பின்னிருந்துதான்

அப்பாவோடு பேசுகிறாள்.

கடைசி வரை அப்பாவும்

மறந்தேப் போனார்

மனசுக்குள் தூர் எடுக்க..!”

    -    நா. முத்துக்குமார்.

(கணையாழி இதழ் விழா ஒன்றில் எழுத்தாளர் சுஜாதா பேசிய போது, “கணையாழி இதழில் வர்ற கவிதைகளை, கடந்த 10 வருஷமா நான்தான் தேர்ந்தெடுத்துட்டு வர்றேன். இந்தக் கணையாழி இதழ்லகூட ஒரு கவிதை வந்திருக்கு. தமிழில் வெளிவந்த சிறந்த 25 கவிதைகளை பட்டியலிடச் சொன்னால் ‘தூர்’ கவிதையை அதில் நான் சேர்ப்பேன்” என்றார். உலகத்துக்கு நா.முத்துக்குமார் அவர்களை வெளிச்சம் போட்டு காட்டிய நிகழ்ச்சி அது.)

 நன்றி: பதிவு

Corporate உலகின் ஒரு அத்தியாயம் - 3

பதிப்பில் இருக்கும்
Corporate உலகின் ஒரு அத்தியாயம் - 2  ஐ மற்றும்
Corporate உலகின் ஒரு அத்தியாயம் - 1  ஐ
படிக்க கிளிக் செய்யவும்,  அந்த அதியாயங்களுக்கும்  இந்த கதைக்கும் எவ்வித தொடர்பும் இருக்காது

முகநுளில் என்னை கவர்ந்த ஒரு சிறு கதை, சற்று மாற்றங்கள் செய்து கதையாய் எழுதி உள்ளேன்

ஒரு மிகப்பெரிய நிறுவனத்தின்  முதலாளி தனக்கு வயதாகி விட்டதால் அவர் நிறுவனத்தின் பொறுப்பை அவரிடம் வேலை செய்யும் ஒரு திறமையானவரிடம் ஒப்படைக்க முடிவு செய்தார். எல்லாரும் தன் அறைக்கு  வருமாறு கட்டளை இட்டார். உங்களில் ஒருவர் தான் என் நிறுவனத்தின் பொறுப்பை ஏற்க வேண்டும், அதனால் உங்களுக்கு ஒரு போட்டி வைக்க போகிறேன். யார் வெற்றியடைகிறார்களோ  அவர் தான் அடுத்தமேலாளர்என்றார்.

என் கையில் ஏராளமான விதைகள் இருக்கின்றன இதை ஆளுக்கு ஒன்று கொடுப்பேன். இதை நீங்கள் உங்கள் வீட்டில் ஒரு தொட்டியில் நட்டு, உரம் இட்டு தண்ணீர் ஊற்றி நன்றாக வளர்த்து அடுத்த வருடம் என்னிடம் காட்ட வேண்டும். யார் செடி நன்றாக வளர்ந்து இருக்கிறதோ அவரே என் கம்பெனியின் பொறுப்பை ஏற்க வேண்டும் என்றார்.  அனைவரும் ஆளுக்கு ஒரு விதை வாங்கி சென்றனர். அந்த கம்பெனியில் வேலை செய்யும் ராமுவும்  ஒரு விதை வாங்கி சென்றான். தன் மனைவியிடம் முதலாளி சொன்ன அனைத்தையும் சொன்னான்.

அவன் மனைவி தொட்டியும் உரம் தண்ணீர் எல்லாம் அவனுக்கு கொடுத்து அந்த விதையை நடுவதற்க்கு உதவி செய்தாள். ஒரு வாரம் கழிந்தது நிறுவனதில் இருக்கும் அனைவரும் தங்கள் தொட்டியில் செடி வளர ஆரம்பித்து விட்டது என்று பேசிக்கொள்ள ஆரம்பித்தனர். ஆனால் ராமுவின் தொட்டியில் செடி இன்னும் வளரவே ஆரம்பிக்கவில்லை.

ஒரு மாதம் ஆனது செடி வளரவில்லை, நாட்கள் உருண்டோடின ஆறு மாதங்கள் ஆனது அப்பொழுதும் அவன் தொட்டியில் செடி வளரவே இல்லை. நான் விதையை வீணாக்கிவிட்டேனா என்று புலம்பினான் ஆனால் தினந்தோறும் செடிக்கு தண்ணீர் ஊற்றுவதை நிறுத்தவில்லை. தன் தொட்டியில் செடி வளரவில்லை என்று அலுவலகத்தில் யாரிடமும் சொல்லவில்லை.

ஒரு வருடம் முடிந்து விட்டது எல்லாரும் தொட்டிகளை முதலாளியிடம் காட்டுவதற்காக எடுத்து வந்தார்கள்.

ராமு  தன் மனைவியிடம் காலி தொட்டியை நான் எடுத்து போகமாட்டேன் என்று சொன்னான்.  அவன் மனைவி அவனை சமாதானப்படுத்தி நீங்கள் ஒரு வருடம் முழுக்க உங்கள் முதலாளி சொன்ன மாதிரி செய்தீர்கள். செடி வளராததற்கு நீங்கள் வருந்த வேண்டியதில்லை. நேர்மையாக நடந்து கொள்ளுங்கள் தொட்டியை எடுத்து சென்று முதலாளியிடம் காட்டுங்கள் என்றாள்.

ராமுவும் காலி தொட்டியை அலுவலகத்திற்-க்கு எடுத்து சென்றான். எல்லார் தொட்டியையும் பார்த்தான் விதவிதமான செடிகள் ஒவ்வொன்றும் ஒவ்வொரு உயரத்தில் இருந்தன. இவன் தொட்டியை பார்த்த அனைவரும் சிரிக்க ஆரம்பித்தனர்.

முதலாளி எல்லாரையும் தன்னுடைய அறைக்கு வருமாறு சொன்னார்.  அருமை எல்லாரும் செம்மையாக செடியை வளர்த்து உள்ளீர்கள் உங்களில் ஒருவர் தான் இன்று பொறுப்பு ஏத்துகொள்ளபோகறீர்கள் என்றார். எல்லாருடைய செடியையும் பார்வை இட்டார். ராமு கடைசி வரிசையில் நின்றிருந்தான் அவனை அருகே வருமாறு அழைத்தார்

ராமு  தன்னை வேலையை விட்டு நீக்கத்தான் கூப்பிடுகிறார் என்று பயந்து கொண்டே சென்றான். முதலாளி ராமுவிடம் உன் செடி எங்கே என்று கேட்டார். ஒரு வருடமாக அந்த விதையை நட்டு உரமிட்டு தண்ணீர் விட்டதை விலாவாரியாக சொன்னான்.  முதலாளி ராமுவை தவிர அனைவரும் உட்காருங்கள் என்றார். பிறகு ராமு  தோளில் கையை போட்டுகொண்டு நமது கம்பெனியின் நிர்வாகத்தை ஏற்று நடத்தப் போகிறவர் இவர்தான் என்றார். ராமுவுக்கு ஒரே அதிர்ச்சி தன் தொட்டியில் செடி வளரவே இல்லை பிறகு ஏன் நமக்கு இந்த பொறுப்பை கொடுக்கிறார் என்று குழம்பிபோனார்.

சென்ற வருடம் நான் உங்கள் ஆளுக்கு ஒரு விதை கொடுத்து வளர்க்க சொன்னேன் அல்லவா அது அனைத்தும் அவிக்கப்பட்ட விதைகள் [Boiled seeds]. அந்த விதைகள் அவிக்கப்பட்டதால் அது முளைக்க இயலாது. நீங்கள் அனைவரும் நான்கொடுத்த விதை முளைக்காததால் அதற்கு பதில் வேறு ஒரு விதையை நட்டு வளர்த்து கொண்டு வந்தீர்கள். ராமு  மட்டுமே நேர்மையாக நடந்து கொண்டான், ஆகவே அவனே என் நிறுவனத்தை நிர்வாகிக்க தகுதியானவன் என்றார்.
நாம் சொல்லும் சொல் | நாம் பயணிக்கும் பாதை நேர்மையாக இருந்தால் வெற்றிகள் நம்மைத் தேடி வரும்...!

வாழ்க்கையில் நேர்மையாக இருக்க முயல்வதும் ஒரு போராட்டம் தான் உண்மையும் நேர்மையும் தர்மத்தை பாதுகாக்கும், நேர்மை ஒரு போதும் வீண்போகாது  | நேர்மையை விதையுங்கள் | பதவியும் பணமும் தேடிவரும்


பதிப்பில் இருக்கும்
Corporate உலகின் ஒரு அத்தியாயம் - 2  ஐ மற்றும்
Corporate உலகின் ஒரு அத்தியாயம் - 1  ஐ
படிக்க கிளிக் செய்யவும்,  அந்த அதியாயங்களுக்கும்  இந்த கதைக்கும் எவ்வித தொடர்பும் இருக்காது

என் இனிய NRI's (வெளிநாடு வாழ் இந்தியர்)

எழுத்தாளர் சுஜாதாவின் பக்கங்களில் இருந்து சில வரிகளை எடுத்து கோர்வை படுத்தி உள்ளேன்

அமெரிக்கா செல்வதற்கு கொடுக்கும் மறைமுகமான விலைகள் சில உண்டு. அவற்றைப் புரிந்துகொண்டு செல்லுங்கள்.

அவை:

1. திரும்ப வரமாட்டீர்கள்… இது கட்டாயம், நூறு சதவிகிதம் நிகழும் ஒரு விளைவு. போய்விட்டு படிப்பு முடித்துவிட்டு உடனே வருகிறேன் என்று சொல்வதெல்லாம் பொய். அந்த நாடு உங்கள் மேல் படரும் நாடு. ஒரு ஆக்டோபஸ், அல்லது மலைப்பாம்பின் இறுக்கம் போல அது உங்களை விடாது. அதன் கிரெடிட் கார்டு சமூகத்தில் உங்களை மூன்றாவது தலைமுறை வரை கடன் வாங்க வைத்துவிடுவார்கள். மீளவே முடியாத கடன் சொர்க்கம் அது. அதைத் தெளிவாக அறிந்து கொள்ளுங்கள்.

2. அங்கே போனபின் உறவு, பாசம் இவற்றுக்கெல்லாம் புதிய அர்த்தங்கள் தோன்றும். எதற்காக அப்பா அம்மாவைக் கவனித்துக்கொள்ள வேண்டும். அவர்கள் கடமையைச செய்தார்கள். வருஷம் ஒரு முறை ஃபாதர்ஸ் டே, மதர்ஸ் டே கார்டு அனுப்பினால் போதுமே… அல்லது அவ்வப்போது நூறு டாலர், இருநூறு டாலர்…  இப்படித் தோன்றும் இந்த எண்ணத்தையும் தவிர்க்க முடியாது. குறிப்பாக, பிசுநாரித்தனம் அங்கு கொஞ்சம் அதிகமாகும்.

3. அங்கே போய் நிறைய சம்பாதிக்கத் தொடங்கியதும் இந்திய விஷயங்கள் மேல் ஒரு ஏளனம் தோன்றும். என்னப்பா உங்க ஊர்ல சரியா ஒரு டாய்லெட் கட்டமாட்டாங்களா. வாட் ட்ராஃபிக்! ஐம் கெட்டிங் ம்யாட். ரோடுல ஒண்ணுக்கு போறவரைக்கும் உங்க தேசம் உருப்படாது… (கவனிக்கவும் உங்க ஊர்....உங்க தேசம்)

4. தமிழ் பேசும் வழக்கத்தையும் மெள்ள இழக்க வேண்டியிருக்கும். நாங்கள் தமிழில் பேசினால் நீங்கள் இங்கிலீஷில் பதில் சொல்வீர்கள். நாளடைவில் தமிழ் படிக்கவே மறந்து போய்விட்டது என்று புளுகுவீர்கள்.

இந்தப் பக்கவிளைவுகள் எல்லாம் பரவாயில்லை என்றால் தாராளமாக வெளிநாடு செல்லுங்கள்.

அண்மையில் நான் ஹாசன் சென்றிருந்தேன். கர்நாடக மாநிலத்தின் மத்தியில் உள்ள சிறிய டவுன். அங்கே இன்சாட் 2-இ செயற்கைக்கோளின் கட்டுப்பாட்டுக் கேந்திரம் உள்ளது. பல இளம் இன்ஜினீயர்களைச் சந்தித்தேன். 24 மணி நேரமும் இந்தியாவின் செயற்கைக்கோளை திசை பிசகாமல் கட்டுப்படுத்தும் ஷிஃப்ட் வேலை பார்க்கிறார்கள். அவர்களில் ஒருவரைக் கேட்டேன். அமெரிக்கா போயிருக்கலாமே… அவர், போயிருக்கலாம். அட்மிஷன் கூட கிடைத்தது, ஸ்காலர்ஷிப்புடன் என்றார்.

ஏன் போகலை? எல்லாரும் போய்ட்டா எப்படி? ஒன்றிரண்டு பேர் தங்கி நாட்டுக்கு சேவை செய்ய வேண்டாமா? என்றார்.

கார்கிலிலிருந்து துவங்கி நம் பிற்பட்ட கிராமங்களில் வயற்புறங்கள் வரை பணிபுரியும் இளைஞர்கள் இருக்கிறார்கள். இவர்கள் மேல்தான் எனக்கு மரியாதை. என்னைக் கேட்டால் இங்கேயே இருந்துகொண்டு எல்லா அசௌகரியங்களுக்கு மத்தியிலும் எதாவது சாதிக்கும் இளைஞர்கள் இந்நாட்டின் கண்கள்… நீங்களோ, நீங்கள் அனுப்பப்போகும் டாலரோ அல்ல! தாராளமாக செல்லுங்கள். சம்பாதியுங்கள். ஆனால், இந்தியாவைக் கேலி செய்யாதீர்கள்.

நன்றி  சுஜாதா  SIR அவர்களுக்கு :-) 

ஈமெயில் முகவரி ஒருவரின் அடையாளத்தை மாற்றியது

என் நண்பர் ஒருவரின் இடம்  எனக்கு கிடைக்க இருந்த வாய்ப்பு தவறி போகின்றது என்பதை  பேசிக்கொண்டு இருக்கும் போது, அவர் கூறிய குட்டி கதை

"வாய்ப்புக்கள் விலகும்போது கவலைபடாதே..எல்லாம் நன்மைக்கே என்று எண்ணி தொடர்ந்து முயற்சி செய்தால் மிகபெரிய வெற்றி உனக்காக காத்திருக்கும்"

ஒரு கம்ப்யூட்டர் நிறுவனத்தில் தரை துடைக்கும் வேலைக்கு ஒருவன் விண்ணப்பித்திருந்தான்.
தரை துடைத்துக் காட்டச் சொன்னார்கள்.

நன்றாகத் துடைத்தான்.

அடுத்து சின்னதாய் ஒரு இண்டர்வியூ. கடைசியில் அவனிடம் தகவல் சொல்வதற்காக ஈமெயில் முகவரி கேட்டார்கள்.

‘ஈ மெயிலா?

எனக்கு ஈ மெயில் இண்டர்நெட்டெல்லாம் தெரியாதே’!!! என்றான்

‘கம்ப்யூட்டர் நிறுவனத்தில் வேலை பார்க்க விரும்புகிறவனுக்கு ஈமெயில் முகவரி இல்லையா? ச்சே!’ என்று அவனை அனுப்பி விட்டார்கள்.  வேலை இல்லை என்றதும் அவனுக்கு என்ன செய்வதென்று தெரியவில்ல. கையில் 100/- ரூபாய் இருந்தன. அதைக் கொண்டு மார்க்கெட்டில் வெங்காயம்
வாங்கினான். பக்கத்து குடியிருப்புப் பகுதியில் கூவிக் கூவி விற்றான் 20/- ரூபாய்  லாபம் கிடைத்தது மீண்டும் வெங்காயம் மீண்டும் விற்பனை. இப்படியே கொஞ்சம் கொஞ்சமாய் விற்று சில வருடங்களில் பெரிய வெங்காய வியாபாரி ஆகிவிட்டார்.

இந்தச் சூழ்நிலயில் ஒரு வங்கிக் கணக்கு திறப்ப சம்பந்தமாக, ஒரு வங்கி ஊழியர் அவரிடம் பேச வந்திருந்தார்.அவனுடய ஈமெயில் முகவரி கேட்டார்.வியாபாரி, ‘ஈமெயில் முகவரி இல்லை’ என்று பதிலளிக்க, ‘ஈமெயில் இல்லாமலே இந்தக் காலத்தில் இவ்வளவு முன்னேறி விட்டீர்களா..?

உங்களுக்கு மட்டும் ஈமெயில், இண்டர்நெட்டெல்லாம்தெரிந்திருந்தால்…?’ என்று ஆச்சர்யமாய்க் கேட்டார் வங்கி ஊழியர்.

‘அதெல்லாம் தெரிந்திருந்தால் ஒரு கம்ப்யூட்டர் நிறுவனத்தில் தரை துடைத்துக் கொண்டிருப்பேன்’என்றார் வியாபாரி...!

- சந்திரா

ஐந்து பெரிது, ஆறு சிறிது – கவிஞர் வைரமுத்து

கவிஞர் வைரமுத்துவின் பக்கங்களில் இருந்து சில வரிகளை எடுத்து கோர்வை படுத்தி உள்ளேன்

“சீ மிருகமே!”
என்று
மனிதனைத் திட்டாதே
மனிதனே

எந்த விலங்கும்
இரைப்பைக்கு மேலே
இன்னொரு வயிறு வளர்ப்பதில்லை

எங்கேனும்
தொப்பைக் கிளியோ
தொப்பை முயலோ
பார்த்ததுண்டா ?

எந்த விலங்குக்கும்
சர்க்கரை வியாதியில்லை தெரியுமோ?

இன்னொன்று :
பறவைக்கு வேர்ப்பதில்லை

எந்த பறவையும்
கூடுகட்டி
வாடகைக்கு விடுவதில்லை

எந்த விலங்கும்
தேவையற்ற நிலம்
திருடுவதில்லை

கவனி மனிதனே

கூட்டு வாழ்க்கை இன்னும்
குலையாதிருப்பது
காட்டுக்குள்தான்

அறிந்தால்
ஆச்சரியம் கொள்வாய்
உடம்பை உடம்புக்குள் புதைக்கும்
தொழு நோய்
விலங்குகளுக்கில்லை

மனிதா
இதை
மனங்கொள்

கர்ப்பவாசனை
கண்டு கொண்டால்
காளை பசுவைச்
சேர்வதில்லை

ஒருவனுக்கொருத்தி
உனக்கு வார்த்தை
புறாவுக்கு வாழ்க்கை

எந்த புறாவும்
தன் ஜோடியன்றி
பிறஜோடி தொடுவதில்லை

பூகம்பம் வருகுது எனில்
அலைபாயும் விலங்குகள்

அடிவயிற்றில் சிறகடிக்கும்
பறவைகள்

இப்போது சொல்
அறிவில்
ஆறு பெரிதா ?
ஐந்து பெரிதா ?

மரணம் நிஜம்
மரணம் வாழ்வின் பரிசு

மாண்டால் -
மானின் தோல் ஆசனம்
மயிலின் தோஅகை விசிறி

யானையின் பல் அலங்காரம்
ஒட்டகத்தின் எலும்பு ஆபரணம்

நீ மாண்டால் …

சிலரை
நெருப்பே நிராகரிக்கும்
என்பதால்தானே
புதைக்கவே பழகினோம்

“சீ மிருகமே !”
என்று
மனிதனைத் திட்டாதே
மனிதனே

கொஞ்சம் பொறு
காட்டுக்குள் என்ன சத்தம் …

ஏதோ ஒரு மிருகம்
இன்னொரு மிருகத்தை
ஏசுகிறது
” சீ மனிதனே !”



நன்றி கவிஞர் வைரமுத்து அவர்களுக்கு